Due to conflicts over 400,000 Oromo people residing in Ethiopia’s Somali region have been displaced

0
300

17-9-2017

According to Addisu Arega,, Bureau Head at Oromia Regional Government Communication Affairs, the number of Oromo ethnic residents forcefully displaced due to “inter-ethnic” conflicts from Ethiopia’s Somali region since last year has reached nearly 416, 807.  The conflict in the past few weeks already displaced 55,000 people and scores were killed from both the Somali and Oromo ethnic groups.

The following is the Amharic version of the Bureau Head’s Facebook note:

የኦሮሚያ ብሄራዊ ክልል ከኢትዮጵያ ሶማሌ ብሄራዊ ክልል ጋር በሚዋሰንባቸዉ የቦረና፣ ጉጂ፣ ባሌ፣ ምስራቅ እና ምዕራብ ሀረርጌ ዞኖች የኢትዮጵያ ሶማሌ ልዩ ፖሊስ በሰላማዊ ዜጎች ላይ በሚያደርሰዉ ጥቃት የተነሳ ከአምና ጀምሮ ሰላም እንዳልነበር ይታወቃል፡፡ ከዚህ ጋር ተያይዞም የበርካታ ንጹሃን ዜጎች ህይወት፣ አካል እና ንብረት ላይ ጉዳት ደርሷል፡፡ በ2009 የበጀት ከአምስቱ ዞኖች የግጭት አካባቢዎች 416,807 የሚሆኑ የኦሮሞ ተወላጆች ከልዩ ፖሊስ ጥቃት በመሸሽ ህይወታቸዉን ለማትረፍ ሲሉ ቀየያቸዉን ጥለዉ ተፈናቅለዋል፡፡ ሠሞኑን በተከሰተ ችግርም ከ55,000 በላይ የሚሆኑ በኢትዮጵያ ሶማሌ ክልል የሚኖሩ የኦሮሞ ተወላጆች ተፈናቅለዉ በሀረር፣ ጭናክሰን፣ ሚኤሶ እና ባቢሌ ከተሞች በድንኳን ተጠልለዉ ይገኛሉ፡፡

የኦሮሚያ ብሄራዊ ክልላዊ መንግስት ሰሞኑን የተፈጠረዉ አሳዛኝ ሁኔታ እንዲረጋጋ፣ በዚህ ፈታኝ ወቅት የሀገራችን አንድነት እንዳይናጋ፣ ከምንም በላይ የህዝቦች በወንድማማችነት እና በፍቅር ላይ የተመሰረተ መስተጋብር እንዳይበላሽ ሃላፊነት በተሞላበት ሁኔታ እየሰራ ይገኛል፡፡ ከምንም በላይ በክልላችን የሚኖሩ የኢትዮጵያ ሶማሌ ተወላጆች ላይ ምንም ችግር እንዳደርስባቸዉ ለማድረግ ዉጤታማ ስራ ተሰርቷል፡፡ የኦሮሞ ተወላጆች ከኢትዮጵያ ሶማሌ ተፈናቀሉ በሚል ሂሳብ በኦሮሚያ ክልል የሚኖሩ የሶማሌ ተወላጆችን እንዲፈናቀሉ ማሰብ ተሸናፊነትና ጸረ ህዝብነት ነዉ፡፡ በመሆኑም በኦሮሚያ ክልል የሚኖሩ የኢትዮጵያ ሶማሌ ተወላጆች እንዳይፈናቀሉ ለማድረግ ከተሰራዉ ዉጤታማ ስራ ባለፈ የህዝብ ለህዝብ ትስስሩን ሊያጠናክሩ የሚችሉ የሰላም እና የወንድማማችነት ኮንፈረንሶች በሁሉም የኦሮሚያ ከተሞች በመካሄድ ላይ ይገኛሉ፡፡ የኦሮሚያ ክልል የሁሉም የኢትዮጵያ ብሄር ብሄረሰቦች እና ህዝቦች ቤት ናት፡፡ ሰሞኑን በተፈጠረ ችግር ሆነ በሌላ ሰበብ በክልላችን አንድም ኢትዮጵያዊ መፈናቀል ሊታሰብ አይችልም፡፡ ይልቁንም በዚህ አጋጣሚ በምንፈጥራቸዉ መድረኮች የህዝቦቻንን ትስስር የበለጠ ለማጠናከር እንሰራለን፡፡ ስለሆነም በክልላችን ነዋሪ የሆናችሁ የሀገራችን ህዝቦች በተለመደዉ ፍቅር እና አንድነት ህብረታችሁን አጠንክራችሁ እንድትኖሩ፣ በዚህ አጋጣሚ በህዝቦች መካከል በመግባት ቁርሾ በመፍጠር የፖለቲካ ትርፍ ለማግኘት የሚንቀሳቀሱ አካላትን እንድታጋልጡ ጥሪያችንን እናስተላልፋለን፡፡

በሌላ በኩል ተፈናቃይ ወንድሞቻችንን መደገፍ ጊዜ የማይሰጠዉ እና የሁላችንም ጉዳይ በመሆኑ የኦሮሞ ህዝብ ወዳጆች የሆናችሁ ኢትዮጵያዉያን በሙሉ በዚህ አስቸጋሪ ወቅት ከጎናችን እንድትቆሙ ጥሪያችንን እናስተላልፋለን፡፡