As Youth Unemployment Rises, Ethiopian Universities Graduate Over 150,000 Students in 2017

0
473

7-7-2016

በዚህ አመት ከ150 ሺህ በላይ የከፍተኛ ትምህርት ተማሪዎች ይመረቃሉ

በዚህ አመት በጠቅላላው ከ150 ሺህ በላይ የከፍተኛ ትምህርት ተማሪዎች እንደሚመረቁ የመንግስት ኮሙዩኒኬሽን ጉዳዮች ፅህፈት ቤት አስታወቀ።

ፅህፈት ቤቱ ለፋና ብሮድካስቲንግ ኮርፖሬት በላከው ሳምንታዊ መግለጫ፥ ከመንግስት ከፍተኛ ትምህርት ተቋማት በመጀመሪያ፣ በሁለተኛ እና በሦስተኛ ዲግሪ መርሃ ግብሮች ትምህርታቸውን አጠናቅቀው የሚመረቁት ከ125 ሺህ በላይ ናቸው ብሏል።

የትምህርት ዘርፉ ከመንግሥት ጠቅላላ ዓመታዊ በጀት ውስጥ የአንበሳውን ድርሻ እንዲወስድ መደረጉን የጠቀሰው መግለጫው፥ በአሁኑ ወቅት ከ28 ሚሊየን በላይ ህዝብ በትምህርት ገበታ ላይ መገኘቱ ለዚህ ማሳያ መሆኑን ጠቁሟል።

በአሁኑ ወቅት ካሉት 36 የመንግስት ዩኒቨርስቲዎች በተጨማሪ በሚቀጥለው ዓመት 11 ዩኒቨርስቲዎች ወደ ስራ ይገባሉ ያለው ፅህፈት ቤቱ፥ በአጠቃላይ በየዓመቱ በከፍተኛ ትምህርት እየሰለጠነ ወደ ስራ የሚገባው የሰው ሃይል ብዛት እየጨመረ መምጣቱን ገልጿል።

መንግሥት በጥራትና በቁጥር እያደገ የመጣውን የሰው ሃይል በፍጥነት ወደ ሥራ ለማስገባትም ልዩ ልዩ ፓኬጆችን አዘጋጅቶ ተግባራዊ እያደረገ እንደሚገኝም ነው በመግለጫው የተነሳው።

ለዚህም ለወጣቶች የስራ ፈጠራ የተመደበውን 10 ቢሊየን ብር ተዘዋዋሪ ፈንድ ለአብነት አንስቷል።

በአጠቃላይ ሀገሪቱን ከድህነት ለማላቀቅ እና ህዳሴዋን ለማረጋገጥ ዜጎች የሥራ ክቡርነትን ተቀብለው በተሰማሩበት መስክ ሁሉ ውጤታማ እንዲሆኑ ፅህፈት ቤቱ ጥሪውን አቅርቧል።

ለሁሉም ተመራቂዎችና ለቤተሰቦቻቸውም የእንኳን ደስ ያላችሁ መልዕክቱን አስተላልፏል።

Source:  Fana and agencies