ገብረህይወት ገብረጊዮርጊስ ወታደራዊ ሚስጥር ለኤርትራ መንግስት አሳልፎ አሳልፎ ሲሰጥ መቆየቱም ተነግሯል

0
449

አዲስ አበባ ፣ ሰኔ 24 ፣ 2009 (ኤፍ ቢ ሲ) በሀገር ክህደት እና የመንግስትን ንብረት በመዝረፍ ወንጀል የተከሰሱ ሶስት ግለሰቦች በእስራትና በገንዘብ ተቀጡ።

የትግራይ ክልል ፍትህ ቢሮ እንደገለፀው የእስራት ቅጣት ከተወሰነባቸው ግለሰቦች መካከል፤

ላለፉት ስምንት ዓመታት የሃገሪቱን ወታደራዊ ሚስጥር ለኤርትራ መንግስት አሳልፎ ሲሰጥ ቆይቷል የተባለ ተከሳሽ ይገኝበታል።

ገብረህይወት ገብረጊዮርጊስ የተባለው ግለሰብ በሳዑዲ ዓረቢያ ተሰውሮ ከቆየ በኋላ፥ በኢትዮጵያ የፀጥታ ሀይሎች ጥብቅ ክትትል ተይዞ ወደ ሃገር እንዲመጣ መደረጉንም ቢሮው ገልጿል፡፡

ወንጀለኛው በስልክ እና ደብዳቤ ልውውጥ የሃገር መከላከያ ሰራዊት አባላትና ጦር መሳሪያን በፎቶግራፍ በማስደገፍ ለሻዕቢያ ሰላዮች አሳልፎ ሲሰጥ መቆየቱም ተነግሯል።

ጉዳዩን ሲከታተል የቆየው የአድዋ ከፍተኛ ፍርድ ቤት ሰሞኑን በዋለው ችሎት ግለሰቡ በሰባት ዓመት ጽኑ እስራት እንዲቀጣ ወስኖበታል፡፡

ከተከዜ የኤሌክትሪክ ማመንጫ ሃይል 10 ሺህ ብር ግምት ያለው ኦፕቲክ ፋይበር ሰርቆ የተከሰሰው ገብረሊባኖስ ታመነ የተባለ ተከሳሽ እና ተባባሪው ግለሰብም በሶስት እና ስድስት ዓመት ከስድስት ወር ጽኑ እስራት ተቀጥተዋል።
ምንጭ፦ ኢዜአ